Çilleri yay mövsümünə necə hazırlamaq olar: mövsüm öncəsi yoxlama siyahısı

Niyə mövsüm öncəsi servis vacibdir

Çiller qış aylarında ya dayanır, ya da minimal yüklə işləyir. Bu müddətdə kondensator lamellərində toz yığılır, su dövrəsində çöküntü əmələ gəlir, elektrik kontaktları oksidləşir. Yay yükü başlayanda bu kiçik problemlər birlikdə kompressoru həddən artıq yükləyir.

Mövsüm öncəsi servisin məqsədi sadədir: aqreqatı tam yüklə işləməzdən əvvəl ölçmək, təmizləmək və zəif nöqtələri tapmaq.

Kondensatorun təmizlənməsi

Hava soyutmalı çillerlərdə kondensator lamelləri Bakının tozlu və küləkli havasında sürətlə çirklənir. Çirkli kondensator kondensasiya təzyiqini artırır, bu da kompressorun daha çox enerji sərf etməsinə və yüksək təzyiq qorumasına düşməsinə səbəb olur.

Lamelləri aşağı təzyiqli su və xüsusi təmizləyici məhlulla yuyuruq. Yüksək təzyiqli yuyucu istifadə etmək olmaz — lamelləri əyir.

Freon və kompressor yoxlaması

Manometrlə sorma və vurma təzyiqlərini, həmçinin həddindən artıq qızma (superheat) və alt soyuma (subcooling) göstəricilərini ölçürük. Bu rəqəmlər freonun miqdarı və genişlənmə klapanının işi haqqında dəqiq məlumat verir.

Kompressorun cərəyanı hər faza üzrə ölçülür. Fazalar arasında fərq elektrik problemi və ya mühərrik dolağında qüsurun ilk əlaməti ola bilər.

Su dövrəsi və nasoslar

Buxarlandırıcıya daxil olan və çıxan suyun temperatur fərqi normal halda 5 °C ətrafında olur. Fərq çox kiçik və ya çox böyükdürsə, su axını düzgün deyil. Nasosların, filtrlərin və axın açarının vəziyyəti yoxlanılır.

Qışda antifriz əlavə olunmuş sistemlərdə konsentrasiyanı ölçürük — həddən artıq qatı qlikol istilik ötürülməsini azaldır.